Närrische Rede zum 11.11.2021 

 

                         S´wär wieder a Freid 

 

En fröhlich närrische Rückblick zu Martini soll i bringe

–  vu glei zwoi so bsch…bsundere Johr,

`S wär wieder a Freid, i hoff´s wird gelinge. 

 

Wenn me 2020 scho gfunde hot grad zum vergesse – 

braucht i denk vu 2021 glei gar it mol schwätze. 

 

Die zwoi Johr die sind also au schnell zammegfasst,

s´war fascht wie im Märchen – Dornröschen, 

wenn oiner so lang het kenne penne, het der it grausig viel vepasst.

 

Schuldig an dere ganze Misere, jo so war’s und isch´s leider mei, 

Covid19 im Hauptstamm und manch humane Begleiterscheinunge gsei. 

 

Was macht me als der Experte der gar koiner isch – 

er sammelt mol Fakte und legts auf de Tisch.

 

Höchstpersönlich hon i also Corona von Anfang bis Ende analysiert,

alles gesammelt , jo aufg’saugt, was auf meim intelektuelle Wisse basiert.

 

Taktisch vor- und umsichtig alle Ergebnis vu de Studie no mehrfach geprüft,

de Blickpunkt au auf de evolutionäre Veränderung grichtet, beleuchtet und meine Gedanke vetieft.   

 

Des fundierte Ergebnis isch eindeutig, klar und logisch und bewiese seit heit -   

I bin koin Experte, hon i glaub vorher scho gseit,

drumm halt i mei Gosch – weil des isch glaub gscheit.

 

So eh ganz normals Johr, däts Herz weng erwäreme - s´wär wieder a Freid 

aber was kasch scho mache wenn´s it mol me en richtige Summer geit.

 

Koi rechte Fasnet, statt me fröhliche Stadtseefest bloß Kälte und Regen, düstere Tristes,

des versetzt de gemeine Pfulledorfer halt oifach in Stress

 

So ranked sich bald Sagen und  Mythen

von selten Arten die es wert sind zu hüten, 

von dunklen Mächten wird denn no berichtet, 

die des Nächtens beim Schaffen von Schandtaten an geheimen Orten gesichtet. 

 

Verstoht me des falsch kühlt die Stimmung ab, s´got manchmol ganz schnell,

do bringt dr it mol meh eh ökologisches Heizkraftwerk was, an re praktische Stell.  

 

 

En Retter messt sich finde  s´ wär wieder a Freid, 

oiner der woiß wie´s wirklich lauft, en Erklärer für die oifache Leit,

- jo kumm was soll´s - i hoiß au Andreas noch mach i des halt heit. 

 

Der Neubau vu de Stadtwerke war niemols in Bedrängnis,

koin Planer oder Ausfüher moß für Getanes oder Vergehen am Arteschutz ins Gfängnis. 

 

Dass de Schultes kennt auf d’ Fledermäus zwar au mol weng grätig sei,

des sieh ich noch der blöde Sache in Wuhan scho au grad ein.

Die Gschicht mit dem Montageschaum braucht koiner glauben,

zum Beweis für i ei Tatsache vor´d Augen.

 

Des Schultes und de Jörg Bias hond nix Schlechtes gführt in ihrem Schild 

Kraftfutter hond se ausbrocht für die kleine Säuger schwach und wild.

Als schene Nebeeffekt ergibt sich mit dere Fütterung praktisch von ganz eloi,

hosch e fette Fledermaus sind die Löcher im Schützebuckel zum nischte für se z’kloi. 

 

Mache hond die zwoi des mese, aus Fachkräftemangel mit eigene Händ,

 wege Pfulledorf schafft de sell Kretschmann zur Abhilfe „THE LÄND“ 

Agspannte politische Beziehunge des hot me früher alles au schomol verlebt, 

aber it auf kommunaler Ebene eher auf bundespolitisch, bilateralem Parkett.

 

Berlin 13. August 1961 – niemand hat die Absicht eine Mauer zu errichten,

Pfullendorf 13. August 2021 – niemand hat die Absicht eine Mauer zu finden. 

 

Mit g’schätzte 600 Johr war die Mauer für unsre Verhältnis noitmol recht alt-  

und trotzem, mir stimmed  zue, isch se würdig für en Erhalt. 

 

800 Johr geits unser Krankehaus – ´s Spital scho fascht in der Form, 

do ploget uns die Zukunft desselben – und zwar enorm.

 

Es gäb -  so duets Zukunftkonzept der SRH klar illustriere, 

koi Möglichkeit zum Erhalt unsers Hauses, 

des mes me noch drei durchspielte Szenarie oifach kapiere.

 

Szenario 3 macht me vor zwei, des kapiersch it jeder, mol bloß nebebei. 

 

 

 

Medizinisch kenn koi Konzept me funktioniere,

es fehled Perspektive so duet me ausführe. 

Mangels Ideen loht mehs überlege glei sei,

bitte stimmed doch alle de oifachheithalber glei mit ei.

 

Des Zahlewerk perfekt ausgführt - griesch g’haue um d’Ohre,

präsentiert wohl fein vu gewiefte Dökter und Professore.  

 

So schlaue Kerle ´s wäre wieder a Freid 

– dätet die schaffe it als Geschäftsführer

- sondern als praktizierende Ärzte, direkt an de Leit.

 

De Austritt aus em Landkreis wird vu de Sulgemer bedacht,

Mensch sind die genügsam, i dät sage mir übernehmed die Macht. 

Des Landratsamt in de alte Kreisstatt wird gschlosse

de Weg für en günstige neie Bettetrakt der SRH isch denn offe.

 

Die Beamte währed in Pfulledorf dohoim - die Situation wäre win win,

unser Krankehaus floriert macht wieder Gwinn,

mir hond als oinzig eh Schloflabor jo scho mit drin. 

 

´s wäre wieder a Freid im nächste Johr an dere Stelle zu berichte,

mir honds überstande und khenned alles zamme im Guete richte. 

 

s’wär wieder a Freid wenn die Fasnet isch it glei vorbei wieder heit.

 

So soll denn au des Motto für 2022 sein,

stimmt euch schon mal jetzt damit ein.

 

De Dank goht an Tede für die Brennsupp, 

des Urteil isch damit endültig vollstreckt  

und für´s nächste Streckgericht hond mir 

scho en neie Schuldige entdeckt. 

 

Koin Programmpunkt soll werde gestriche, 

werde passt in dem Zammehang glaub ganz gut- 

für eh bunte Fasnet isch jeder Punkt wichtig, 

mir braucht bloß Mut. 

 

Auf unsere Fasnet dreikräftige Narri Narro, Narri Narro, Narri Narro

 

Für die Stegstrecker   

Andreas Narr    

11.11.2021